Helgina 16.–18. október fóru rúmlega 90 Kópar á Úlfljótsvatn í hina árlegu félagsútilegu. Félagsútilegan er fyrir alla fálkaskáta og eldri í félaginu og er ákveðinn hápunktur í starfinu ár hvert. Í ár var hún sannkölluð hátíðarútilega, því Kópar fögnuðu 80 ára afmæli sínu þann 22. febrúar síðastliðinn og var helgin því öll í afmælisþema. Félagsútilegan var einnig ákveðin uppbót fyrir félagsútileguna sem átti að vera í mars 2026 en var flutt í bæinn vegna óveðurs.
Lagt var af stað frá Digraneskirkju á föstudagskvöldi. Þegar komið var á Úlfljótsvatn komu skátarnir sér fyrir og fengu sér kvöldkaffi áður en ró færðist yfir hópinn og allir fóru að sofa til að vera klár í pakkaðann laugardag.
Laugardagurinn hófst á tjaldbúðaskoðun og formlegri setningu útilegunnar. Svo tók dagskráin við. Skátarnir spreyttu sig í klifurturninum og prófuðu bogfimi. Í skátaleikunum kepptu tvö lið um að kveikja eld og verða fyrst til að brenna í sundur band sem strengt var yfir eldstæðið. Fyrir áhugasama var einnig í boði að styrkja hæfileikana í að súrra eða föndra vinaarmbönd. Um kvöldið var svo haldin kvöldvaka með skemmtiatriðum sem skátarnir höfðu æft yfir helgina.
Þegar myrkrið skall á kom í ljós að einhver hafði stolið öllum afmælisblöðrunum úr afmælinu! Í næturleiknum þurftu skátarnir að endurheimta þær með því að leysa þrautir á póstum víðs vegar um svæðið. Þau þurftu meðal annars að tefla, byggja mannlegan pýramída, komast í gegnum þrautabraut með egg og borða eitthvað sem seint verður kallað lostæti. Fyrir hverja leysta þraut fékkst blaðra með staf, og saman mynduðu stafirnir orðið BÁTAR. Á leiðinni þurfti líka að vara sig á bófum og lygurum sem reyndu eftir bestu getu að leiða skátana af réttri braut.
Seinna um nóttina bættust nýir dróttskátar í hópinn þegar háleynileg dróttskátavígsla fór fram við varðeldinn.
Sunnudagurinn fór í morgunmat, frágang og þrif áður en haldið var heim. Rútan kom í Kópavog rétt eftir hádegi með þreytta en sæla skáta.
Stórar þakkir fá foringjar og rekkaskátar sem lögðu mikla vinnu í að gera helgina ógleymanlega, og auðvitað skátarnir sjálfir fyrir frábæra stemningu. Við hlökkum strax til næstu félagsútilegu eftir ár!
